彼得林治喺退休前曾講過：如你投資股票，必須知道股價隨時可大幅回落，只係唔知道幾時回落。喺我記憶中似乎冇人能準確預測何時回落，雖然好多人曾作許多預測。投資股票有如到賭場買大細，你永遠唔知道下一鋪係開大或開細。精明如林治亦咁講，各位認為一般所謂分析員嘅水平如何？因此，一般投資者不宜過分注重timing，而應將注意力放响stock picking 上。其次係利用「水車投資法」，即PE8至12倍之時全部資金入市；PE12倍到16倍時70％資金入市；PE16倍到20倍時50％資金入市；一旦PE高出20倍，只留30％响市場。根據Ibbotson Associates嘅Sahadi研究，1926年如你投資100元响標普五百指數身上，到2006年12月你有307700元。喺972個月中，如你錯過其中40個月，2006年你嘅回報只有1823元！即過去81年，99％升幅集中响40個月內（佔全部時間4％）。Sahadi進一步指出，1987年如投資100元在標普五百指數身上，2006年12月回報係931元；240個月中，如你錯過急升嘅17個月，回報只有232元，即84％升幅集中响7％嘅月份內！
水車投資法損失有限
結合林治同Sahadi嘅理論，過分強調timing，結果只係High Risk, Few Rewards。1997年8月至今過去10年，一般投資者中80％係輸家。睇完上述分析後，你仲有冇興趣再學timing？有D危機事前十分明顯，只要細心已可避過，例如1987年10月股災前、1997年8月亞洲金融風暴前、2000年3月科網股泡沫爆破，如只用水車投資法（PE20倍以上時只投入資金30％），損失有限。
我老曹十分失望嘅係，仲有人認為250天移動平均線係牛熊分界線。移動平均線理論係1973年7月《信報》創刊時從外國引入，我老曹運用移動平均數已有35年歷史。我老曹一再強調，移動平均線理論中並冇牛、熊市，牛、熊市係根據道氏理論，即牛市分三期、熊市分三期，呢個已係1900年前嘅理論，近代已被人一再質疑。現代經濟咁複雜，股市係咪仲存在牛、熊市？大量國企來港上市後，本港股市對房地產依賴漸減，牛、熊市理論係咪仲有價值？
過去35年我老曹研究移動平均線嘅經驗係：A、牛市一期恒生指數唔會跌穿250天線。B、牛市二期恒生指數經常跌穿250天線，每次跌穿250天移動平均線不但唔係出貨訊號，反而係入貨訊號。C、只有响牛市三期恒生指數跌穿250天線，才係牛市死亡訊號。
結合道氏理論如下：A、牛市一期PE8至12倍時，恒指應唔會跌穿250天線。B、牛市二期PE12到16倍，恒指跌穿250天線係入貨訊號。C、牛市三期PE响18到22倍，跌穿250天線才應小心。1997年8月同2000年3月恒指PE都喺22倍以上，牛市三期十分明顯。2003年4月恒指回升至今，未見PE22倍以上（反之，國企指數已在22倍之上，國企股已進入牛市三期，即瘋狂上升期，開始唱《夕陽之歌》。後市展望，股市繼續swings，投資策略係：你驚我唔驚，你唔驚我驚。
沒有留言:
發佈留言