曹sir投資心得 (投資三招)

一直有蓄起部份投資者日記裏曹sir的投資心得，在這裏跟大家分享一下。

投資者日記 2005-03-17

股票市場永遠係20％投資者賺其餘80％輸家蚊年，永遠唔會改變，你企喺哪一邊？賭錢嘅欲望係天生嘅，必須抑制，投資行為係後天培養，但我地往往將「賭」嘅欲望誤為投資意欲。　

一、作為投資者，每年將收入總和10％或以上儲起嚟，你有冇咁做？同時將額外增加嘅收入儲起嚟作投資資本，你有冇？

二、每年只搵四至六隻股份，而唔係朝種樹晚鋸板，回報率通常每年20-30％或以上。　　

三、資金按比例分配，例如2002年至去年美元睇淡，外幣佔比重上升；近年開始黃金應佔投資組合上升到15％。至於股票已進入投機性濃嘅時刻，以小本博大利嘅二線股，投資組合中亦包括房地產。1997年前集中喺香港，1997年後除自住物業外宜放眼世界，任何地方房地產形成泡沫後宜減持，再去其他國家，但由於言語所限，最好唔離開英語區（因為英語區國家重法治精神）。忘記估市集中個別股份

作為投資者，最重要守則係乜？就係知道何時自己不知所謂。知彼容易知己難，即使全球最優秀分析員，都不能準確預知明年股市會點樣，但市場上偏偏最多人嘗試。請忘記預測，請緊守崗位分析個別股份，選股不炒市，學習商家佬諗嘅方法－呢件嘢有冇賺錢，而非經濟學者成日估後市點樣。唔好大諗頭，請留心細節，集中注意力喺個別自己持有嘅公司身上而非宏觀經濟，因為你唔係溫家寶！　　

分散資產、嚴守止蝕，耐心持有賺錢項目，才係小富之道。投資的結果往往是你獲得「應得」嘅而非「想得」嘅，自律、節儉、正直、努力工作、耐性等優點都會獲得回報；反之，沉迷睇電視或購買六合彩、賭馬、賭波等，都只會令你走向貧窮而非富有，因此必需有自制，玩吓無妨，沉迷不可。金錢只會流向應得嘅人手中，而非流向只懂得睇電視問止賺止蝕嘅人，許多人以為致富之道係接近市場，其實剛相反；許多人以為致富之道係擁有物業，結果又係相反。　　

大量成交而股價微升，大升先兆。

呢個已係老掉牙嘅投資策略，但運用得好嘅人卻唔多。自從七十年代《信報》引入移動平均數理論後，可改為喺牛皮市中二線股一旦股價高於五十天移動平均線，可列為「股價微升」對象；成交必須配合出現「柱狀成交額」（volume spike）；如兩種形式同時出現，係典型大量成交而股價微升，乃最佳入市時候，因為係大升先兆。

大成交失守50天線冇鞋挽屐走

　　「有智慧不如趨勢」被我老曹經常掛喺口邊，就係一旦趨勢形成（例如前者）便加入，只要上升趨勢未完（例如股價仲係一浪高於一浪）便死揸唔走，唔好為咗樹木而放棄整個森林。　　

大量成交而股價微跌，係大跌先兆，利用五十天移動平均線一旦失守而同時成交額急升出現柱狀成交額，便冇鞋挽屐走。　　

只要記住上述三招，已打贏好多所謂投資專家。上述三招由1970年至今已有三十五年歷史，已令唔少追隨者搵過唔少大錢（唔係5％或10％果隻），呢個係老掉大牙嘅古老方法，只係許多人已忘記。　　

世事充滿缺陷，例如股價微升（略破五十天移動平均線）但同時冇柱狀成交額配合，通常仍會上升，但唔太肯定。其次係大量成交但股價未肯微升，亦係令人存疑。不過上市公司咁多，從中搵呢類股份應該唔係太難事。年輕讀者唔好睇少呢類老掉大牙股市分析法，佢有三十五年歷史，可以話幾經考驗仍能生效嘅工具，如果你唔識唔怪得你，通常以蝕本收場。