分散投資(三)

分散投資除了要考慮資產種類，還需要同時考慮資金分配，曹sir曾提出以下的「水車投車法」(07年8月)，不失為一個有價值的參考。

...彼得林治喺退休前曾講過：如你投資股票，必須知道股價隨時可大幅回落，只係唔知道幾時回落。喺我記憶中似乎冇人能準確預測何時回落，雖然好多人曾作許多預測。投資股票有如到賭場買大細，你永遠唔知道下一鋪係開大或開細。精明如林治亦咁講，各位認為一般所謂分析員嘅水平如何？因此，一般投資者不宜過分注重timing，而應將注意力放响stock picking 上。其次係利用「水車投資法」，即PE8至12倍之時全部資金入市；PE12倍到16倍時70％資金入市；PE16倍到20倍時50％資金入市；一旦PE高出20倍，只留30％响市場。根據Ibbotson Associates嘅Sahadi研究，1926年如你投資100元响標普五百指數身上，到2006年12月你有307700元。喺972個月中，如你錯過其中40個月，2006年你嘅回報只有1823元！即過去81年，99％升幅集中响40個月內（佔全部時間4％）。Sahadi進一步指出，1987年如投資100元在標普五百指數身上，2006年12月回報係931元；240個月中，如你錯過急升嘅17個月，回報只有232元，即84％升幅集中响7％嘅月份內！

結合林治同Sahadi嘅理論，過分強調timing，結果只係High Risk, Few Rewards。1997年8月至今過去10年，一般投資者中80％係輸家。睇完上述分析後，你仲有冇興趣再學timing？有D危機事前十分明顯，只要細心已可避過，例如1987年10月股災前、1997年8月亞洲金融風暴前、2000年3月科網股泡沫爆破，如只用水車投資法（PE20倍以上時只投入資金30％），損失有限。